Sunday 8 December 2013

Cefndir

Does dim llawer yn edrych ar yr hyn ag yr ysgrifennaf yma. A dweud y gwir nis credaf fod neb wedi ei ddarllen dim ond pori dros y we a dod ar ei draws yng nghanol blogiau bobl eraill mewn iaith y maent yn ei ddeall. Ta waeth, efallai y daw 'na rywun rhyw ddiwrnod a darllen fy myfyrdodau cryf ond, tan hynny, rwyf yn siarad efo fi fy hun. Does affliw o'r ots gen i yn hynny o beth chwaith, llwyfan i fy meddyliau dw i'n chwilio amdano. Llwyfan i geisio gwagio (dyna Gymraeg da) fy meddwl o feddyliau sydd wedi newid fy ffordd o edrych ar fywyd. Wedi newid fy ffordd o feddwl pwy neu beth ydw i.

Ceisiaf fy ngorau i roi cefndir i chi a wnaiff rhyw fath o ateb pwy ydw i. Ond, wrth gwrs, rwyf yn aelod o'r ddynol natur. Mae hynny'n ateb beth ydw i ond wrth reswm, mae'n gryn dipyn yn fwy na hynny. Roeddwn i'n meddwl mai athro oeddwn i. Gweithiais am oriau dros gyfnodau a bron i mi syrthio oddi ar y daith honno o "addysg uwch" droeon. Ond, es yn f'ymlaen a mwynhau pob tamaid ohono wrth gael fy ngwefreiddio gan y canlyniadau yr oeddwn wedi colli oriau ar ben oriau o fywyd cyffredinol, ac oriau cysgu na chaf fyth yn ôl, yn herio fy hun i'r eithaf tuag atynt. Ar ben hynny, yn llwyddo, ac yn llwyddo'n dda! Gradd 2:1 mewn Cymraeg (roedd elfennau eraill i'm gradd yn ogystal ond peryg i hynny ddatgelu gormod). Pasio TAR wrth ymarfer Cymraeg Iaith Gyntaf a Chymraeg Ail Iaith yn yr ail gyfnod. Gwych. Bendigedig. Dysgulots. Agoriadllygaid. Dimbydondmwynhau. Na! Sori. Roedd amser pan roedd y straen yn cael gafael arnoch chi. Felly dydi Dimbydondmwynhau ddim yn hollol gywir. Oedd 'na amser cythryblus wrth gynllunio gwersi a gorfod eu hysgrifennu munud fesul munud, paratoi am y gwersi hynny drwy greu adnoddau. PowerPoint. Wedyn, roedd gofyn i mi werthuso pob un o'r gwersi hynny. Yn y cyfamser roedd disgwyl i mi fonitro ac asesu cynnydd y dosbarthiadau yr oeddwn wedi'u mabwysiadu. Roeddwn wrth fy modd!! Allweddell y cyfrifiaduron yn tanio'n feunyddiol ac am oriau. Creu gwersi effeithiol iawn a'r dysgwyr i gyd yn mwynhau!! Ac wrth gwrs roeddwn yn cynllunio a chreu traethodau hefyd. Yr astudiaeth agored. Mwynheais i bob tamaid o'r profiadau. O'r diwrnod cyntaf i'r olaf o fy ngradd ac yna'r ymarfer dysgu. Dyma beth yr oeddwn i erbyn diwedd y cyfnod TAR - Athro!

Rydych chi'n gorffen y cwrs Tysysgrif Addysg i Raddedigion ddiwedd Mehefin. Doeddwn heb gael yr amser i hyd yn oed ddod o hyd i swydd yng nghanol yr holl waith ond cefais 3 gyfweliad. Roedd y gyntaf yn eithaf pell o'm cartref a buasai rhaid i mi ymgartrefu yno. Serch hynny, roedd awyrgylch yr ysgol yn arbennig o hyfryd. Roedd yr athrawon yn y staffrwm wedi ymlacio'n braf a'r sgwrs a'r chwerthin yn ddigonol. Ches i mohoni. Roedd fy narpar wraig yn falch ond ta waeth. Doeddwn i ddim. Roeddwn yn falch dros enillydd y swydd. Roedd hi ar fy nghwrs TAR ac yn haeddiannol iawn ohoni! Yna, cefais gyfweliad arall mewn ysgol a oedd rhyw awran yn y bore ac awr a hanner i ddod adref dwi'n tybio. Roedd hynny'n dderbyniol gan fy mod wedi gwneud tua'r un pellter wrth wneud f'ymarfer dysgu. Ond, ni chefais ei chynnig ac roeddwn ar ben fy nigon. Doeddwn i ddim eisiau gweithio yno a dweud y gwir. Ar ddiwrnod olaf y tymor ym mis Gorffennaf cefais gyfweliad arall a oedd yn eithaf pell, tua 3 chwarter awr. Roedd teimlad da yn yr ysgol. Ambell i wyneb cyfarwydd - 6 yn trio, un efo cysylltiad yno'n barod wrth wneud llanw yno. Ges i hi a threulies flwyddyn gyfan o'm bywyd yn yr ysgol hon. Roedd pob eiliad yn bleser llwyr. Ond, fel pob swydd arall ym myd addysg, blwyddyn cewch gynnig yn y lle cyntaf y dyddiau hyn. Felly, daeth swydd i fyny (i'r ysgol yr wyf ynddi ar hyn o bryd), ymgeisiais amdani a chefais yr anrhydedd o gael cynnig. Roedd y teimlad yn grêt, yr ysgol yn fendigedig. Roeddwn yn edrych ymlaen yn arw.

A dyna fo mewn gwirionedd. Dechreuais ym mis Medi a dwi'n fan hyn rŵan. Yn mwydro fy mhen fy hun a phen unrhyw un sydd eisiau clywed.............................gadewch neges os ydych yn gwrando.

My-Fi

Friday 6 December 2013

Y Nosweithiau'n Unig

Yr wyf yn fy ngwely ers oriau. Wedi gwylio dwy ffilm efo fy narpar wraig. Y mae hi'n chwyrnu'n braf yn y gwely a minnau ar lawr yn ysgrifennu hwn. Ia, yn gorwedd ar y llawr.

Ceisio dadansoddi fy holl feddyliau ydw i ac yn ceisio deall pam y teimlaf fel hyn. Unig. Pryderus. Ofnus. Unig. Anefnyddiol. Methiant. Unig. Wedicaeldigon. Nunlleidroi. Argoll. Wedinewid.
 
Wrth gwrs bod rhaid mynd at graidd popeth wrth geisio chwilio am atebion. Fel llys barn er enghraifft, rhaid cael clywed y dystiolaeth cyn mentro i gael arfarniad gan reithgor. 12 pen yn eich dyfarnu'n euog neu'n ddieuog a minnau'r un modd. Ond, 12 meddwl yn fy mhen sydd gen i ac yn methu'n glir a'u cael i gytuno. Felly, pendroni gwnaiff y 12 meddwl a fy rhwystro i rag cysgu. Cymryd drosodd fy meddylfryd yn gyfan gwbl. Daw meddwl heibio a hwnnw'n crefu arna i fynd yn ôl i'm gwaith. Ei ffrindiau o wedyn yn dweud wrtho am beidio fod yn fyrbwyll. Rhywbeth arall yn dweud 'babi'. Un arall yn dechrau rhestru'r rhesymau a minnau methu'n glir a medru'u blaenoriaethu. Dydyn nhw ddim mewn trefn. A'r isymwybod yn dechrau siarad yn gall drwy bwyntio. Pwyntio tuag ati hi sydd yn gorwedd yn y gwely yn breuddwydio am y bywyd moethus hwnnw yr wyf wedi'i addo iddi. Wedi lladd fy hun drwy golegau am bedair blynedd heb ddim llawer o hyfforddiant blaenorol megis ysgol. Wedi rhoi'r traethodau bondigrybwyll i mewn ar amser ac wedi llwyddo i ddadansoddi gweithiau bobl enwog iawn a rhoi fy marn arnynt i ateb cwestiynau mewn iaith nad oeddwn yn gwybod a oedd yn bodoli bron. Yr iaith Gymraeg ydy hi wrth reswm ond nid fel yna roeddwn i wedi arfer siarad nac ysgrifennu'r iaith cyn y diwrnod cyntaf hwnnw yn y Brifysgol. Roedd hi'n galed. Caled iawn oedd ceisio meistroli’r iaith Gymraeg llenyddol a sylfaenol. Arferiad ydy tafodiaith. Serch hynny, mi wnes i o. A brwydro drwy ymarfer dysgu wedyn a gweithio dan 7 y bore cyn cael cawod a mynd i'r ysgol i ddysgu.

Mi wnes i o. Cefais swydd wedyn mewn ysgol fendigedig (nid bod hon yr wyf ynddi ddim) a thorrais fy nghalon wrth ymadael â hi mewn gwirionedd. Ond, roeddwn wrth fy modd gyda'r her newydd o ysgol newydd a dod â'm mhrofiadau blaenorol efo mi a chryfhau! Bod yn well! Datblygu! Codi safonau ym myd addysg drwy roi'r cant y cant ym mhopeth!! CRASH!!!! Dyma fi wedi chwalu. Efallai nad breuddwydio am y bywyd moethus yr wyf wedi'i addo iddi y mae fy nghymar annwyl. Efallai mai hunllef sydd arni, am yr hyn, sydd siŵr gen i, o'i blaen hi.

Siŵr eich bod yn ysu am gael clywed beth a ddigwyddodd ond - nis gwyddwn. Mae gen i atebion ond pa un sy'n gywir? Ble rydych yn dechrau traethu am yr hyn sydd wedi dwyn eich holl hyder? Gwneud i chi grynu pan nad ydych yn teimlo'n gyfforddus. Gwneud i chi grynu pan welwch dorf o bobl. Chwydu ar adegau heb rybudd. Peidio mynd allan ar eich pen eich hun. Afiach o deimladau!! Mae'n braf cael dweud bod 'na fymryn o obaith mewn gwirionedd. Yr wyf bellach yn teimlo'n dipyn gwell a dweud gwir.

Edrychaf ymlaen cael clywed gan y GP i gael mynd i weld Nyrs Mental Health.......... dof yn fy ôl yn fuan......gadewch neges a diolch am ddarllen....

My-Fi

Monday 2 December 2013

Dros Wythnos o'm Gwaith :-(

Yr wyf wedi bod i ffwrdd o'm gwaith ers dros wythnos bellach. Wedi colli pob ysbryd o fynd yn ôl i ddysgu a dweud y gwir. Yr wyf wedi colli fy holl hyder mewn gwirionedd. Cael teimlad o gryndod mwyaf sydyn wrth fynd i mewn i unrhyw le mae 'na bobl. Teimlo'n anesmwyth iawn a methu ateb y cwestiwn - "pam nad wyt ti yn dy waith?"

Dechreuodd y broblem yn yr ysgol. Roeddwn yn chwydu ac yn cael "rhif 2" afreolaidd o wlyb (sori - dim ffordd arall o'i ddweud) - yn teimlo fel fy mod i'n sâl go iawn. Crynu, teimlo'n oer, wedyn yn gynnes. Afiach o deimlad nad oedd yn braf. Yn enwedig wrth sefyll o flaen llond dosbarth o blant. Gwnes y penderfyniad i fynd adref y diwrnod hwnnw'n reit hawdd a dweud y gwir. Dydd Llun ydoedd ac roeddwn wrthi ar amser cofrestru gyda'm dosbarth hyfryd o flwyddyn CA3. Maen nhw'n wirioneddol hyfryd! Gallant fod yn eithaf siaradus ond ta waeth, plant ydy plant wrth reswm.

Serch yr holl anwyldeb yn y dosbarth, roeddwn i'n flin efo nhw. A dydw i ddim yn berson blin o gwbl, yn enwedig efo plant. Hanner awr o gyfnod tiwtorial a doeddwn fethu peidio â chodi fy llais er mwyn eu tawelu. Roeddwn yn chwysu fel mochyn a dim ond eisiau eistedd i lawr. Dyna a wnes i a dweud y gwir, a gadael iddyn nhw. Felly, yn dilyn y cyfnod roedd gwers 1 ar fin cychwyn. Diolch i'r drefn fy mod efo cyfnod CPA gwers 1 ar ddydd Llun.

Es i i weld y swyddog yr ydych yn siarad ag o/hi pan mae gennych broblem yn ein hysgol ni. Person gwerth chweil sydd wir yn edrych ar eich hol pan mae rhywbeth yn bod. Does dim pryder mynd i'w (g)weld o/hi o gwbl. Dywedais beth a oedd yn bod arnaf ac adref a fi. (Roeddwn i mewn "car share" a dim car felly roedd rhywun yn gorfod dod i fy nol - aeth hynny ddim i lawr yn dda iawn chwaith).
Roeddwn yn teimlo'r un peth ddydd Mawrth, ac yna ddydd Mercher. Yn enwedig yn y boreau. Felly, ddydd Mercher, gwnes i apwyntiad efo'r meddyg. Wel, mi drïes - ond doeddwn i'm yn cael! Dim lle! Tybiwn i mai ysgrifenyddesau'r meddygon sydd pia nhw!! Ond, ta waeth, ces apwyntiad ddydd Iau. Dechreuais siarad ag o am fy nheimladau a'r pethau a oedd yn digwydd i mi'n gorfforol.....

Pan ddywedodd o'r gair - roeddwn yn teimlo'n sâl go iawn - "depression". Ces i fraw, es i i grynu yn y fan a'r lle, cefais drafferth anadlu, roedd yn rhaid iddo fy nhrin. Des at fy hun. Ces dynnu gwaed rhag ofn bod nam corfforol a dyna ni...........

Ces i bapur ganddo i fy rhoi i ffwrdd o'm gwaith am wythnos i aros am ganlyniadau'r profion gwaed.....

Dof yn ôl atoch...... gadewch neges os gwelwch yn dda......
My-Fi